Мышка лыжкай кашу ела,
Кашу есці не хацела.

Мама-мышка просіць, просіць!
Лыжку міма мышка носіць.

Міма рота носіць лыжку,
Бо раз-пораз – зірк! – у кніжку.

Кніжка ў мышкі пра катоў,
Пра нахабных вуркатоў.

Марыць мышка дужай быць
І нягоднікаў злавіць –

Чорных, белых, паласатых,
І пухнатых, і вусатых,

І вялікіх, і малых,
Маладзенькіх і старых.

І драпежнікаў-піратаў
Звесці мышка будзе рада.

Усіх – з зялёнымі вачыма…
Усіх, усіх, каго магчыма!

Мышка лыжкай кашу ела,
Дужай быць яна хацела!

Зай

Ходзіць Зай – ды па капусце,
Носіць сон у белай хусце.
Зай, сыночку сон аддай,
А сам побач спачывай…

Дожджык-грыбасей

Дожджык, дожджык
Грыбасей!
Кроплі буйна,
Шчодра сей!

Там, дзе ўчора
Дождж прайшоў,
Скарб сабе
грыбнік знайшоў.

Пад сасонкаю –
Масляк,
А пад елкаю –
Казляк.

І лісічкі,
І ваўнянкі
Знойдзе ён,
Бо ў лесе зранку

Дожджык, дожджык,
Грыбасей!
Кроплі буйна,
Шчодра сей!

Таццяна Мушынская